14. eguna

Lehenengo orduan, hau da, jolas libreko unean, haur batzuekin aurreko egunean bukatu ez genuen puzzlea egiten aritu naiz, gaur bukatzeko denbora eman digularik! Beste haur batzuk, berriz, Nekane klasea ematen ari denean esaten dituen gauzak, keinuak, etab. imitatzen aritu dira, gainera ahulki baten eserita, Nekane egoten den bezala zeuden! Haur batzuk lurrean eserita zeuden eta beste hiru haur aulkietan eserita. Nekane eta biok adi egon gara eta benetan ikustekoa zen!

            Arduradunak bikain egin ditu bere lanak, laguntzarik ez du behar izan eta esandako eta egindako guztia ederki egin du.

            Arduradunarekin bukatu eta gero, eta lurrean eseri baino lehen, denok eskutik hartu gara abesti hau abesteko:

Zatoz gurekin goazen eskua emadazu,

Hemen lagun pila bat egingo dituzu,

Lai, lai, lai

Egingo dituzu…

Ondoren, eskutik askatu eta irakaslearen laguntzarekin “Zazpi Antxume” -en  ipuina antzezten hasi gara. Oso dibertigarria iruditzen zait erabiltzen duen antzezteko modua, hau da, narratzaile eta pertsonaiek esaten dutena esatea, keinuak egitea, ahotsak aldatzea …Dena buruz ikasteaz gain, , haurrak ondo pasatzen dute eta gelako beste haurrekin harremanetan jartzen dira. Jarduera hau egitean haurren aurpegia ikusi besterik ez dago zein gustura eta pozik dauden ikusteko!

Ingelerara joan baino lehen ariketa bat egin dugu, horretarako haur bakoitza bere margoekin bere tokian eseri da. Nekanek eta nik orriak banatu ditugu eta ondoren, irakasleak ariketa azaldu du. Orrian zazpi antxumeak kolorerik gabe agertzen ziren, eta hori dela eta, haurrek koloreztatu egin behar izan dituzte. Nekanek azalpena eman duenean, antxumeen aurpegia, hankak eta eskuak txuri kolorean uzteko esan die, eta horrela egin dute, nahiz eta haur batzuk horiek ere margotu dituzten. Ariketa bukatzeko ez dugu denborarik izan, baina arratsaldean jarraitu dugu, gero,  bakoitzak bere orrian “ZAZPI ANTXUMEAK” idatziz. Ariketa hau egiterakoan bi gertakari izan ditugu, bata goizean eta bestea arratsaldean. Lehenengoa, margotzeko unean beti gertatzen da, ariketa ez duela egin nahi esaten digu beti ume berberak eta negarrez hasten da ariketa bukatu arte. Ariketa egiten ari denean urduri eta zer egin ez dakiela ikusten zaio, begirada batekin laguntza behar duela eskatzen digu, berak badaki gu hor beti gaudela laguntzeko prest eta. Bigarren gertaera, berriz, arratsaldean izan da, beste ume batek Nekanek pixka bat gehiago margotzeko eskatu dioenean orria puskatu du eta negarrez hasi da, Nekanek berarekin hitz egin du eta azkenean berriro ere hasieratik margotzen hasi da; margotzen bukatu duenean ni bere ondoan egon nahiz idatzi beharrekoa idazten laguntzeko, baina Nekanek ez zuela merezi esan dit eta berak bakarrik jarraitu du.

Gaur gurasoei ohar bat bidali zaie, bata euskaraz eta bestea elebitan, eta ni izan naiz orri bakoitzean haur bakoitzaren izena jartzeaz arduratu dena..

 Arratsaldean, Jarduerarekin bukatzerakoan, ordenagailu gelara joan gara. Haur bakoitza bere tokian eseri da eta kaskoak jarri dituzte. Nekane eta biok, aldiz, beste ordenagailu batean eseri gara, esan nizuen bezala gai berri batekin hasi gara, etxeen gaiarekin, hain zuzen ere. Hori dela eta, interneten munduko etxebizitza desberdinak bilatzen aritu gara, gero haurrei munduan etxe desberdinak daudela erakusteko. 

Eta horrekin eman dugu eguna amaitutzat!